En konekshon ku evenementunan pa 2008.

Konferenshanan di prensa di Boneiru na Aruba i Kòrsou

Boneiru lo bai hasi promoshon na e islanan bisiña Aruba i Kòrsou djaweps 03 di aprel 2008 i Djabièrnè 04 di aprel. Riba tur dos isla lo tene konferenshanan di prensa en konekshon ku evenementunan grandi ku lo tuma lugá na Boneiru pa e aña aki. E evenementunan ta lo siguiente: Dia di Rincon, Bonaire Heineken Jazz Festival, Pro Kids i Bonaire International Sailing Regatta. Tambe lo tuma e oportunidat di duna un bista general di desaroyo turístiko riba e isla di Boneiru.

E konferenshanan di prensa ta un inisiativa di Tourism Corporation Bonaire (TCB). Pa e konferenshanan di prensa aki, lo konta ku partisipashon di e siguiente instansianan ku ta traha den koperashon ku TCB: Bonaire Jazz Foundation, Aquaspeed i Bonaire Sailing Foundation. Atraves di e konferenshanan di prensa aki, Bonaire atrobe lo wòrdu promové na un manera positivo. Ta spera ku despues di tene e dos konferenshanan di prensa aki, públiko lo ta debidamente informá i lo skohe di bishita nos isla durante e fecha nan aki na Boneiru. E eventonan ta brinda un oportunidat ideal pa esnan di nos islanan ruman bishita Boneiru. Pa TCB e ta un bon oportunidat pa, pa medio di esaki, pone Boneiru "in the picture" atrobe.

Djaweps próksimo, 03 di aprel, e konferensha di prensa na Aruba lo tuma lugá i Djabièrnè, 04 di aprel, esun na Kòrsou.

E delegashon ku lo ta presente lo konsistí di; Ronella Tjin Asjoe-Croes Direktora di TCB, representante di Bonaire Jazz Foundation, Elvis Martinus di Aquaspeed i Bsaf, Byron Tromp di Bsaf i Edsel Pieter tambe representando Bsaf .

E konferenshanan di prensa aki ta parti di promoshon pa e eventonan menshoná. Konferenshanan di prensa lokal lo ser tene pronto tambe i lo ser anunsiá sea dor di TCB òf e organisashon konserní.

BSaF ku vários inovashon

Preparashon pa e di 41 Regata Internashonal di Bonaire ta avansando

Despues ku Bonaire a selebrá eksitosamente su di 40 edishon di Regata aña pasa, e preparashon pa e di 41 'Bonaire International Sailing Regatta" ya a kuminsá.

Na final di Regata 2007 BSaF komo organisadó a anunsiá ku nan lo kuminsá for di tempran ku Regata 2008 i ku sigur lo bini kambio i inovashon nan positivo den e evento ku lo tuma lugá e aña aki di 5 pa 11 di òktober. For di yanüari BSaF i TCB ta reuniendo tur siman pa plania entre otro promoshon di e magno evento aki internashonalmente.

Regata komo un evento ku ta uni belerista, bishitantenan i e pueblo mester mantené su kultura úniko i sigur e empuhe ku e evento aki ta duna Bonaire ekonómikamente i turistikamente. Ku e puntonan aki den mente TCB i BSaF ta trahando duru pa hasi e evento aki mas grandi i trese mas bishitante nos isla. Karta pa spònser a sali masha tempran i e organisashon a kuminsá reuní kaba ku su posibel spònsernan pa diskutí nan pakete. Ta e intenshon pa e aña aki traha ku un grupo selektá di spònser mayó i trata na yega na un kontrato pa mas aña ku lo ta benefisioso pa ámbos partido. E idea aki a kai den masha bon tera i ya BSaF a haña algun konfirmashon.

Kambionan

Pa loke ta trata kambionan, BSaF pa vários aña kaba tabata sondeando e posibilidat pa bira miembro di Caribbean Sailing Association (CSA). CSA su sede ta na Antigua i ta konsistí di mayoria isla nan pariba den Karibe ku ta kore di Trinidad te ku Puerto Rico.

Di 15 pa 17 di febrüari último Elvis Martinus i Byron Tromp di BSaF a bishita Antigua

pa reuní ku e asosiashon aki. A interkambiá idea i diskutí den ki forma Bonaire por benefisiá di CSA. E delegashon di Bonaire a probechá tambe di e okashon aki pa promové e Regata di Bonaire komo ku ta netamente den e wikènt ei a tuma lugá e di 16 edishon di 'Jolly Harbor Valentine Regatta'. Mester menshoná ku e direktiva di CSA ta sumamente kontentu ku e desishon di Bonaire pa bira miembro pasobra esaki ta netamente parti di nan tarea pa promové kompetensha amatùr di yatenan den henter Caribe, enkurashá un desaroyo deliniá di e deporte i implementá un solo sistema di regla (handicapping) di kompetensha ku mester keda usa pa yatenan.  

BSaF (Bonaire) lo tin hopi benefisio komo miembro di CSA komo ku ta bou di e organisashon aki su reglanan di kompetensha e Regatanan di tantu St. Maarten, Antigua, Granada, Martinique, St. Thomas, BVI, Republica Dominicana, Puerto Rico i mas ta tuma lugá. CSA tin mas ku 40 aña di eksistensha pues ta un organisashon sólido i ku hopi eksperensha. Ademas CSA tin su kalendario di evento di henter aña ku e ta saka dos aña adelantá pa metanan promoshonal, i ta pone tambe su ofishalnan profeshonal riba vários tereno na disposishon di su miembronan pa garantisá un evento na nivel i balansá na satisfakshon di tantu e partisipantenan komo e organisadó mes. Yatenan ku ta partisipá bou di reglanan di CSA den e vários Regatanan den Caribe tambe lo mira Bonaire komo un potensial lugá di kompetensha. Pues, Bonaire komo miembro di CSA ta un echo i mas despues lo bini ku mas informashon di e detayenan tékniko di e kambionan ku ta konta pa   yatenan partisipante. Pa loke ta trata regla di kompetensia pa tur otro kategoria, esaki nan no ta kambia.

Programa

E programa tentativo di Regata 2008 ta kla i por tuma nota di esaki riba BSaF su bunita website www.bonaireregatta.org ku tambe a keda di 'update'.Mester menshoná ku mayoria di e aktividatnan di tur aña den e siman deportivo di Regata (Regatta Sport Week) manera Softball, Volleyball, Dominó, Kayak Race, Regatta Walk etc ta konfirmá. Aktividat èkstra e aña aki ta un Parada di Karnaval na apertura di Regata ku ta Sali Stadion pasa Kaya Grandi, subi Malekon na Kas di Regata i kulminá na Parke Wilhelmina. E parada aki mester bira huntu ku e tradishonal Parada di Bandera (All Nations Parade) parti di e apertura ofishal di Regata 2008. E idea aki ta pa duna e malekon un ambiente festivo for di komienso di e siman di Regata. BSaF i Fukabo a reuní na vários okashon kaba riba e aktividat aki. Fukabo a informá ku den un reunion ku nan a tene, e idea aki a kai den bon tera serka tantu gruponan komo individual ku a partisipá e aña aki den e karnaval di Bonaire. Tur loke ta e aspektonan tékniko, logístiko ku e gruponan mester keda trata ainda pero e aktividat aki meskos ku tambe un 'Teener Parade' un aktividat nobo komo atrakshon meimei di siman riba e djarason di Regata lo keda inkorporá den e programa di Festival di Regata 2008 den koperashon ku FUKABO. Mas informashon lo keda duna despues pa tantu FUKABO komo BSaF. Un inovashon e aña aki lo ta ariba e djasabra final di Regata. Ta asina ku ora ku kompetensia kaba i tin entrega di premio djabièrnè anochi ta keda un bashí den bahia di Kralendijk. Pa trese ambiente den bahia ta studiando e posibilidat pa tene un show di boto den bahia estilo Fuik Dag na Kòrsou. BSaF i e promotor ta deliberando e aspektonan organisatorio   ku mester yena e djasabra den dia te ku atardi ku músika, baile i demostrashon di botonan den bahia di Kralendijk.

Regatta Festival

Festival di Regata 2007 tabata eksitoso i BSaF ta keda mantené e sitio kaminda esaki a tuma lugá esta Parke Wilhelmina i bisindario. Ya tin vários kontakto a tuma lugá pa loke ta trata gruponan ku mester bini djafó. Por spera un sorpresa agradabel e aña aki i tambe e aktividatnan nobo manera nos a menshoná kaba mas ariba den e komunikado aki

Nobo e aña aki lo ta pantaya grandi na banda di esenario ku ta brinda tambe oportunidat pa mustra aktividat riba laman durante dia, propagá spònsernan i sigui e aktividat riba esenario. Ta studiando e posibilidat pa pone pantaya i sistema di sonido riba área ku no tin bista riba e esenario pa asina di tur ángulo sigui e shownan presentá. E pruebanan aña pasa di un 'life streaming via internet' esta transmishon di e Festival bibu via website a mustra ku mester kontinuá ku e proyekto aki. Asina tin mas informashon, nos lo informá di esakinan.

Promoshon

Pa loke ta trata promoshon, di 6 pa 9 di mart último tabatin e famoso "St.Maarten Heineken Regatta" ku ta un di Regatanan mas grandi di Karibe. Den estrecho koperashon ku TCB, a manda un stagiare ku ta asistiendo BSaF ku materialnan di promoshon di Bonaire Regatta. Esakinan a keda repartí entre e partisipantenan i tur interesado na e evento aki. Un banner di TCB i BSaF tambe a keda permití pa kologá durante e evento pa metanan promoshonal. Pa loke ta trata e lunanan benidero, meskos ku tabata e kaso aña pasa, TCB konhuntamente ku e organisadónan di Bonaire Jazz, Dia di Rincon, Pro-Kids, Bonaire Regatta,   i Karnaval lo biaha pa tantu Aruba komo Kòrsou dia 3 i 4 di Aprel pa konhuntamente promové e aktividatnan mas popular di Bonaire. E enkuentronan lo ta ku miembronan di Prensa di e islanan ariba menshoná. E aña aki tambe e vakashon di Aruba ta kai igual ku esun di Bonaire i Antia, pues por spera atrobe un gran kantidat di partisipante i bishitante for di hermana isla Aruba na Bonaire. Den kurso di siman nan ku ta bini BSaF lo tene un enkuentro ku prensa lokal pa hasi algun anunsio importante i sigui promové i tene e pueblo informá.

Atentamente

Bonaire Sailing Foundation (BSaF)
Byron Tromp / Sekretario / Kordinadó General
31-3-08